Осцилации

ОСЦИЛИРАМЕ МЕЃУ СОПСТВЕНОТО ДОБРО И СОПСТВЕНОТО ЗЛО
МЕЃУ СВОЈАТА ЉУБОВ И МУДРОСТ И СВОЈАТА ГЛУПОСТ И БЕДА
ТЕЖНЕЕЈКИ КОН СВОЈОТ ВРВ СЕ АКАМЕ ОД СОПСТВЕНОТО ДНО
А ПОТОА КАКО ДЕЦА ПЛАЧИМЕ НАД СЕКОЈА ЗДОБИЕНА ПОВРЕДА

Исус Христос од Назарет

Слегуваме на земјава според волјата Твоја
Слегуваме Господе како несвесни Богови
И секој во себеси го носи коњот од Троја
Секој ќе биде искушан од оној со рогови

И јас како и вие имам убедувања и искуства
И јас како и вие имам едно тело и еден ум
И јас поседувам разни мисли и разни чувства
И јас се обидувам да спознаам кој сум, што сум

Се среќаваме повремено во реалноста виртуелна
Понекогаш во сон,а понекогаш во состојба будна
И секое его сака да завземи позиција челна
Водејки некаква си несвесна его игра залудна

Секој нешто научил, доживеал, искусил, пробал
Секој грабнал ронка мудрост од Твојата вселена
Секој дел од душата своја на ѓаволот му продал
Секој по тро ја искакал и помочал белата пелена

И Го грабнал својот Бог под мишка ко книга
И цитира зборови и стихови наизуст научени
И до небеси својот глас Господе го подига
А не знае за злосторствата во име Твое случени

Се бориме како крвожедни ѕверови во оваа арена
Ние паднатите ангели со бесни умови и срца огнени
И сите сонуваме за рајот, за земјата ветена
Додека зла крв тече низ нашите артерии и вени

Некој се фатил за Тебе Исусе Христе, О Господе Боже
Некој цврсто се држи за Мохамед, Заратустра, Буда
Премногу труд во задржување на предрасудите е вложен
Од страна на секоја земна заблудена глава луда

А јас, јас запамтив само една реченица вистинита
“УБИЈ ГИ“ АКО НА ПАТОТ ГИ СРЕТНИШ ИСУС, МОХАМЕД ИЛИ БУДА
Додека нив не ги “убиеш“ умот твој и натаму ќе скита
Во земјата на Алиса исполнета со безброј разни чуда

старо ново

имам deja vu од некои претходни реинкарнации
чувствувам како искуствата ми се повторуваат
старите теми ми се јавуваат во нови варијации
духовите на минатото сега и овде ми зборуваат

господе како ништо да не се сменало со еони
старите рамки со нови слики се пополнуваат
пирамидите се запоседнати од новите фараони
новите зраци во старите сенки се засолнуваат

и денденес ја чувствувам шпанската инквизиција
вооружена со нови најсуптилни цензорски методи
ме брише без пардон новата крстоносна полиција
и секоја моја различност дирекно в очи ги боди

старите тронови од нови задници се запоседнати
златните жезла најцврстите раце гордо ги држат
главите на новите робови до земја се наведнати
истите `ртови и денденес по мене злокобно `ржат

старите глупости нови усти свечено ги изговараат
а јас отстрана жално ги гледам и пак им се чудам
пак за стари работи наново со ѓаволот преговараат
се преиспитувам себеси зошто јас за сето тоа судам

старото како ново да ми го подметнат се обидуваат
старите рани со нови лекови сакаат да ми ги излечат
и додека нови вавилонски кули в небеси подигнуваат
посакувам старите вредности срцата да им ги очовечат

Господе, помогни ми

Господе помогни ми со его умов да се справам
Да престанам со ревносните борци да се борам
Помогни ми Боже љубов од се`срце да им давам
Она што е по волја Твоја, тоа и да го сторам

Господе помогни ми да ги надминам своите мани
Да ги прочистам умов и срцево од еонската кал
Господе, со љубов и мудрост Ти нив ги нахрани
И напој ги со живата вода од Твојот свет грал

Господе помогни ми да станам тро посвесно битие
И да се издигнам над сопствената глупост и беда
Да престанам да им го толкувам Христовото житие
И да си ја излечам сета длабока душевна повреда

Господе помогни ми на Патот повторно да се вратам
И внеси јасеновиден поглед во моиве заслепени очи
Помогни ми чесно цената за гревовите да ја платам
И да се идентификувам со Оној што во мене сведочи

Panta rei

луѓето ги менуваат своите погледи кон свето
нивните умови се лелеат како на ветро вејки
едно мислат, друго зборуваат, а прават трето
започуваат со плачење, а завршуваат смеејки

искуства

ме продадоа за купишта девизи,
а сега сакаат за ситно да ме купат
и денеска ми нудат измислени кризи
о господе со кого ли в мозок се дупат

ме ставија на берзите како ефтина роба
и секојдневно ја менуваат мојата цена
искуствата лични ќе ги носам до гроба
оние со нив и оние со бившата жена

?

мртов сум господе, повреден и депресивен
и прифатен да бидам од некоја жена сакам
и со љубовта нејзина пак да бидам оживен
тогаш ќе престанам по беспатијата да акам

мртов сум господе, но ќе оживеам како и да е
ни една педа не можам напред да се поместам
огромно количество љубов во срцево мое чмае
сепак, ми треба уште малку време да се свестам

знам дека имам во умов некои несвесни блокади
последици од некои длабоки емоционални рани
постојано некоја подмолна јанѕа однатре ме јади
и моите слабости со негативна енергија ги храни

ти ми си потпора о господе боже, чувствувам и знам
и нема да се откажам од смислата, љубовта и одот
и се`, буквално се` од себеси тебе господе ќе ти дам
и верувам дека тогаш живот ќе му дариш на плодот

знам дека кога ќе заслужам ти ќе ми отвориш врата
а дотогаш најдоборото од себеси морам да го вложам
и ќе му се радуваме на убавината јас и ти, ние двата
и додека верувам во тебе, знам, сакам, умеам и можам

о боже, и покрај големиот број грешки од мене сторени
ти сеуште од длабочините на срцево тивко ми зборуваш
со љубов ги храниш сите мои надежи до смрт преморени
сал ти боже вистински ме љубиш и мудро ме прекоруваш

а јас од тебе и натаму постојано нешто ко питач молам
дај ми сила да издржам, дај ми жена што ќе ме прифати
а никако да се поместиш од срцево мое да ти дозволам
и на крајот пак ти си тој што мојата сметка ќе ја плати

прости ми господе што се чувствувам ранет и безвреден
фрлен покрај патот, во ендекот и прекриен со прашина
сокриен во себеси, истоштен, остарен и душевно беден
како некоја стара и во отпад фрлена `рѓосана машина

душа која си го отслужила своето и денеска никому потребна
отуѓена од тебе господе, повредена од себеси и од светот
чека и нејзе да и` дојде редот за последната поворка погребна
со земја да и` биде прекриено телото, а со заборав поетот

но, има во мене еден пргав и нескротлив, неразбирлив дел
има нешто во мене бунтовно, расколничко, бесно и диво
има нешто кое верува и знае дека самото на себеси си е цел
има во мене нешто непокорно, љубовно, креативно, живо

токму тоа господе ме бодри и не ме остава да рикнам на мира
не ми дозволува да се предадам, да се откажам од тебе и од себеси
и клокоти во срцево мое, како во некое буре што зоврива шира
и постојано сонува, трага, копнее по и тежнее кон твоите небеси